SEIGNEURIE DE LOBEL

S’ensievent les despens fais et soustenus par Jehan LE CLERCQ Lieutenant de Bailly en la terre et Seigneurie de Lobiel appartenant à hault et puissant Dame Madame Yollent DE LUXEMBOURCQ
Seneschalle de Hainau Dame de Roubaix de Herzelles et de Néchin et Chysoinx, despens commenchiés en ladicte Seignourie dudict Lobiel depuis le jour et … Saint Rémy XV C et treize et finant audict jour St Rémy XV C et quatorze et lesdictes despens au commandement de Madicte Dame en la manière que s’ensieult.

Item payet aux hommes de fief dudict Obiel, de Compté, de Bourgyes et du Bos pour avoir par eux adiugié les bans de march de l’an XV C treize, bans d’aoust de l’an XV C et quatorze, chacun
d’iceux XV souz, tout ensamble : VI Libvres.

En marge : Il en est alouet sur Lobel XXX Solz.

Item payet aux hommes de fief et eschevins dudit Obiel pour avoir esté che présent an XV C quatorze faire vizitations de chemins aveucq ledit Lieutenant, à laquelle vizitation de chemins a esté trouvé pluisieur desfaus adiugiés par lesditz hommes de fief les quelz d’aulcuns sont en d..at au présent et pluisieur se desfendent estre la calle… dudit Lieutenant et pour che atendent lesditz hommes de fief de riens juger de che tant que le tout sera un droit et aux aultres comptes en sera
déclaré ……che en che que en sera fet pour che despende à ladicte vizitation et aussy payet par ledict Lieutenant pour les dessus dictz : LIIII Solz.

Page 2

Item payet à Jehan DESFRENES pour avoir par luy réfectionnet le « get » che…d contre le bos de le Royère quy estoit très grandement admeurés et desfés à cause de « liauwe » quy l’avoit tout ..nt ………tet lequel DESFRESNES a broutet … audit che..d aussy ..  et y parfet toutte la réfection pourtant ensamble : dix Solz.

S’ensieuvent les despens fais au commandement de madicte Dame à cauze de avoir bany ung nommé Loys CARETTE à cauze de avoir par ledict Loys et de ses mains commis et perpétré le fet et
homicide de feu Jehan VAN SPEL che en la paroisse de Willem dépendant dudit fief de Lobiel comme s’ensieult et premiers pour avoir adiugié le vérité espécialle aussy les avoir ad…chiés et publyés en l’église dudit Willem à heure de grant messe par jour de sollempnete et de no. che ce … que on volloit avoir pour scavoir ledict fet d’omicide pour che : XXV Solz.

Item en ensievant che fu le jour tenu de  l’espécialle vérité par ledict Lieutenant, plussieurs hommes de fief dudict lieu, aussy le clercq de la loy par les sergans et officyers dudict lieu pour ledict jour fu
« despende » et payé par ledict Lieutenant pour yceux : LX Solz.

Page 3

Item en ensievant che acer…. jour ensievant fut par lesdictz hommes de fief à la requeste dudit Lieutenant vizité le contenu de ladite espécialle vérité aussy en pris « leptret » et délivret en le main dudict Lieutenant et après che fut par ledict Lieutenant en « lequelle » jour sollempnel à la grant messe présents lesdicts hommes de fief « d’ouir » et déclaré jour pour le premier et aultre
es…ant audict Loys CARETTE que pour se venir deffendre e deffendre se volloit pour che payet : XII solz.

Item après che fu le premier jour gardé et observé estre ledict Loys le callengant (ou calleugant) à cause dudict me... dominde a y estre pendus et estranglé tant que mort en « fus est » es…enye
se il en est estre présent et à cauze qu’il estoit fugitif le callenga (ou calleuga) a y estre banys c….. nullement et sur le « hart » dudict fief et Seignourie dudict Obiel des appendences et despendences aveucq, de toutte la compté de Flandres et de touttes les appendences et despendences pour
ledict jour pour l’advanchement de la loy fet par ledict Lieutenant et sept hommes de fiefs pour che : XLV solz.

Item en ensieuvant fu gardé le second jour par ledict Lieutenant et six hommes de fief pour che pour l’advanchement de la loy : XL solz.

Page 4

Item et après che y eult plusieurs del… prins tous jours tenant la cauze en jour et en loy de tierch jour en tierch jour et tant en che proche.. que le jour de tierch jour jusques pour che néant.

Item audict tierch jour fu gardé et observé par ledict Lieutenant et sept hommes de fief et ois ledict Loys CARETTE comm…ssé et débouté de touttes dess… et le jour ras…. quart jour pour en oir le
jugement, pour ledict jour : XLV solz.

Item audict quart jour que ledict banissement fu fet et déclaré par le manière dicte fu ledict jour gardés et observés par ledict Lieutenant, dix hommes de fief parmy responsibles et lois ledict Loys ….. banys par le manière dicte pour che pour ledict jour pour ladicte sentence et
bancq pour che : LX solz.

Item che que « dict » est nous hommes de fief dudict Obiel telz que Jehan DE LATTRE fil de feu Collart, Jehan DE LE PLANCQUE, Jacquemart DU PRET, Jehan MORGANT, Pierart LE MERCHIER et
Mahieu DES MESTRES certiffions ainsy en avoir esté fet tesmoing, no seing manuel chy mis le XIIIème jour du mois d’octobre XV C quatorze.

Montent ces présentes ensamble XXIII libvres XI solz.

Page 5

Rensaingné de plusieurs amendes de LX Solz enguagiés durant ledit an et premiers :

Glandin RYS en a ungne enguagyé pour avoir navret à sancg ung nommé Allart BRACQUAVAL du fief et Seignourye de Compte.

Pareillement en ladite Seignourye ungne enguagyé par Jehan PLOUCQUET dit Guelette pour avoir navret à sancg ung nommé Biertoul LE CLERCQ dit Hainne.

Suivent les signatures :

DU PRET                   Noël ESPINOIT                    Jan CORNUT